Kriasaun portal CNA nian ne’e ho objetivu atu habelar disponibilidade informasoens kona-ba aprovizionamentu tanba Komisaun ida ne’e haka’as an tomak hodi dezenvolve prosesu implementasaun aprovizionamentu ida ne’ebé modernu, transparente no kompetitivu. Aleinde ne’e atu permite iha partisipasaun ne’ebé barak liután husi ema sira ne’ebé interesadus – liu-liu publiku timor nian – hodi garante relasaun ida ne’ebé di’ak kona-ba kualidade/presu iha konkursus hotu-hotu no nune’e, Komisaun bele prova nia integridade ba partes tomak ne’ebé envolve iha ne’e.

Optimizasaun iha uzu ka utilizasaun rekursus finanseirus país ne’e nian, liuhusi prosedimentus konkursu ne’ebé kompetitivus, permite governu implementa tan projetus dezenvolvimentu hodi konkretiza dezenvolvimentu ida ne’ebé sustentável ba povu timoroan tomak.

Portal ida ne’e fornese informasoens ne’ebé atualizadas kona-ba atividades CNA nian inklui anúnsius kona-ba konkursu, estadu ka situasaun relasiona ho prosedimentus aprovizionamentu ne’ebé hala’o daudaun no mos informasoens kona-ba kalendarizasaun informasoens, seminárius no workshops ne’ebé CNA rasik mak sei ministra ka jere no orienta tomak ba klientes espesífikus sira – hanesan parte integrante husi mandatu CNA nian iha dezenvolvimentu kapasitasaun kona-ba matéria aprovizionamentu.  Mellorias ne’ebé sei kontinua halo ba portal ida ne’e , sei permite CNA halo movImentasaun gradual  hodi tama ba iha aprovizionamentu eletróniku, ne’ebé sei permite hetan partisipasaun kandidatus Barak liután, hodi nune’e bele reduz kustus no asegura  transparênsia ho kompetitividades iha konkursus.

Ho mellores kumprimentus

Hermingardo Albano Soares
Diretor - Ezekutivu  CNA